ភ្នំពេញ៖ អាជ្ញាធរបានបំបែកសំណុំរឿងប្លន់ម៉ូតូប្រដាប់អាវុធចំនួន ៤ករណី និងឃាត់ខ្លួនជនសង្ស័យបានចំនួន ៩នាក់ដែលតែងតែធ្វើសកម្មភាពដេញតាមម៉ូតូជនរងគ្រោះនៅកន្លែងស្ងាត់ដោយយកកំាភ្លើងភ្ជង់ប្លន់យកម៉ូតូ និងវាយជនរងគ្រោះនៅក្នុងភូមិសាស្ត្រខណ្ឌកំបូល រាជធានីភ្នំពេញ។

អាជ្ញាធរចុះប្រតិបតិ្តការស្រាវជ្រាវ និងតាមចាប់ជនសង្ស័យបានចំនួន ៩នាក់នោះចាប់ពីថ្ងៃទី១៩-២១ ខែធ្នូ ឆ្នាំ២០២២។

ក្នុងចំណោមជនសង្ស័យចំនួន ៩នាក់នោះ គឺមានម្នាក់មានមុខរបរជាកម្មករសំណង់ ហើយម្នាក់ទៀតមានមុខរបរជាសន្តិសុខ ចំណែក ៧នាក់ទៀតគ្មានមុខរបរត្រឹមត្រូវឡើយ។ ក្នុងនោះ ៦នាក់រស់នៅក្នុងខណ្ឌពោធិ៍សែនជ័យ ចំនួន ២នាក់រស់នៅក្នុងខណ្ឌកំបូល ហើយ១នាក់ទៀតរស់នៅក្នុងខណ្ឌដង្កោ។

បច្ចុប្បន្នជនសង្ស័យ និងវត្ថុតាង កម្លាំងជំនាញនៃអធិការដ្ឋាននគរបាលខណ្ឌកំបូល កំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់៕